The good part which will not be taken away from you!

இயேசு கிறிஸ்து மார்த்தாள், மரியாள் மற்றும் அவர்களுடைய சகோதரனாகிய லாசருவிடம் அன்பாயிருந்ததினால், அநேகந்தரம் அவர்களை சந்தித்து விசாரித்து வந்ததுமல்லாமல், தம்முடைய சிலுவை மரணத்திற்கு முந்தைய வாரம் கூட அவர்களோடு தங்கியிருந்தார்.பெத்தானியாவில் இருந்த அந்த மரியாளின் வீட்டை நம்முடைய உள்ளான வாழ்க்கைக்கு ஒப்பிட்டு பார்ப்போமானால் நம்மிலும் மார்த்தாள், மரியாள் மற்றும் லாசரு என்னும் கதாபாத்திரங்கள் இருப்பதை கண்டு நீங்களே ஆச்சரியப்படுவீர்கள்.

லாசரு: ஒரு சமயத்தில் பாவங்களிலும், தப்பிதங்களிலும் மரித்து போயிருந்த உங்களை, தேவன் தம்முடைய மேலான அன்பினாலே உயிரடைய செய்து தம்முடைய பந்தியிலே விருந்துண்ணும்படியாக அநுக்கிரகம் செய்திருக்கிறார்.

மார்த்தாள்: நீங்கள் ரட்சிக்கப்பட்ட உடனே தேவனுக்காக பல காரியங்களை கவனமாய் செய்து, தேவனை உங்கள் கிரியைகளினால் பிரியப்படுத்த விரும்பினதினால் எந்நேரமும் மார்த்தாளை போல பற்பல வேலைகளினால் வருத்தமடைந்திருக்கிறீர்கள். ஆனால் தேவனோ, நீங்கள் மரியாளை போல எப்பொழுதும் அவர் பாதத்தருகே அமர்ந்து அவர் வார்த்தைகளை தொடர்ந்து கேட்டு, அவர் சித்தம் செய்ய வேண்டும் என்று வாஞ்சிக்கிறார்.

மரியாள்: உங்களை விட்டு எடுபடாத நல்ல பங்கை தெரிந்து கொள்ளும்படியாக கிறிஸ்து இயேசு உங்களை அழைக்கிறார். எனவே, உங்களுடைய உள்ளான வாழ்க்கையை உற்று நோக்கி, எப்பொழுதும் உங்களுக்குள் வாசமாயிருக்கும் இயேசுவை பார்த்து கொண்டு அவருடன் வாழுங்கள். தேவனுக்கு இரண்டு வாசஸ்தலங்கள் உண்டு; ஒன்று பரலோகம், மற்றொன்று நீங்கள். இந்த உலகத்தில் நீங்கள் தான் தேவன் தங்கும் வாசஸ்தலமாய் இருக்கிறீர்கள். எனவே இயேசு கிறிஸ்துவின் பிரசன்னம் உங்களுக்குள் இருக்கிறது என்ற விழிப்புடன் எப்பொழுதும் உங்கள் உள்ளான வாழ்க்கையை அவருக்கு நேராக திருப்பி, அவர் முகத்தை தரிசித்து, அவரை நேசித்து, அவரோடு சம்பாஷிக்கிற அனுபவத்தில் உங்களை பழக்கி கொள்ளுங்கள்.

“நான் உங்களுக்குள் இருக்கையில் நீங்கள் ஏன் என்னை வெளியே தேடுகிறீர்கள்?” என்று இயேசு கேட்கிறார். தம்முடைய பிள்ளைகள் தங்கள் உள்ளான வாழ்க்கையில் அவரோடு ஐக்கியப்படும்போது இயேசு மிகுந்த சந்தோஷமடைகிறார், ஆகையால் அவருக்கே உரியதான உங்கள் வாழ்க்கையின் மையத்தினின்று உங்கள் சுயத்தை விலக்கி அவருக்கு இடம் கொடுங்கள். அப்பொழுது அவர் உங்களில் காணப்படுகின்ற மாம்சத்தின் கிரியைகளையும், உலகத்தின் ஆதிக்கங்களையும் வேரோடு அகற்றி, தம்முடைய வார்த்தையில் வளர்ந்து அவரோடு ஒன்றாகும்படி உதவி செய்வார். இதனால் நீங்கள் எஜமானாகிய தேவனுக்கு, உபயோகமுள்ள பாத்திரமாய் மாறுவீர்கள்!

தேவன் தாமே உங்களை ஆசீர்வதிப்பாராக!

ஸ்.ர்.மனோகர்.